فته شاورما لحمه

اول حاجه هنكون جايبين اللحمه متقطعه تقطيع الشاورما او قطعوها ف البيت شرائح متوسطه هنجيب طبق كبير هنحط فيه اللحمه وعليهم كبايه زبادي وعليهم بهارات الشاورما وثوم بودر وبصل بودر وربع كبايه خل ومعلقه صغيره فلفل اسود ونقلبهم كلهم في بعض ونغطيهم ونسبهم ف التلاجه من ساعه ل ساعتين ويستحسن تبقي متبله قبليها بليله

هنقطع العيش الشامي مكعبات ونحمره ف الزيت او الأير فراير ونسبهم ع مصفاه ع جنب لحد مانجهز باقي الوصفه

هنعمل بقي الأرز هنجيب حله نحط فيها زيت وسمنه لحد مايسخنوا وهنكون غاسلين الارز البسمتي ومصفينه كويس جدا هننزل بالارز ع الزيت والسمنه اول مايسخنوا ونقلبهم ونحط معلقه صغيره كاري وكركم ومكعب مرقه دجاج وعيدان القرفه واللمون المجفف و٤ قرنفل و٢ ورق لورا ونص معلقه ثوم بودر وبصل بودر ومعلقه صغيره ملح ونحط 2 كوب مايه مغليه ونقلبهم كلهم مع بعض ونسبهم لحد مايغلوا ونوطي عليهم خالص ونسبهم يستوا

هنجيب طاسه كبيره فيها 3 معالق زيت كبار وعليهم معلقتين سمنه بلدي وليية متسيحه ونسبهم يسخنوا كويس اوي وننزل عليهم باللحمه من غير مانقلبها وارل ماتاخد لون نبتدي نقلب وبعد كده هنوطي النار ونحط نصف كبايه مياه ونغطيها ونفتح كل ربع ساعه نزود ربع كبايه مياه مغليه لو محتاجه واول ماتبدأ تستوي ننزل عليهم بالبصل والفلفل والطماطم واول مايدبلوا اللحمه هتكون استوت نطفي عليهم ونزود عليهم مقدونس فريش ومعلقتين طحينه وبس كده

هنعمل بقي التوميه هنجيب معلقتين نشا هندوبهم في كبايه مياه نحطهم ع نار هاديه ونفضل نقلب لحد مالقوام يبقي شفاف ونسيبه ع جنب يبرد خالص ونجيب كبه او خلاط ونحط فيها ربع كوب زيت ومعلقتين زبادي كبار ومعلقتين لبن كبار ومعلقتين مايونيز ومعلقه صغيره ملح و5 فصوص ثوم وعصره ليمون وننزل عليهم بالخليط في الكبه ونضربهم كلهم لحد مايبقي القوام كريمي وكده تبقي التوميه جاهزه

كده فته الشاورما جاهزه معانا هنقدمها بقي بشكل منظم وبس كده بالهنا والشفا ❤️